ಹೆಚ್.ಸಿ ಗಿರೀಶ್ ಹರಿಯಬ್ಬೆ, ಎಂ.ಎಲ್ ಗಿರಿಧರ, ಮಲ್ಲಪ್ಪನಹಳ್ಳಿ.
ಚಂದ್ರವಳ್ಳಿ ನ್ಯೂಸ್, ಚಿತ್ರದುರ್ಗ:
ರಾಜ್ಯದ ಜೀವನಾಡಿ ನೀರಾವರಿ ಯೋಜನೆಗಳು ರೈತರ ಬಾಳಿನಲ್ಲಿ ಮಂದಹಾಸ ಮೂಡಿಸಬೇಕಿತ್ತು. ಆದರೆ, ಇಂಜಿನಿಯರಿಂಗ್ ಲೋಪಗಳು, ರಾಜಕೀಯ ಇಚ್ಛಾಶಕ್ತಿಯ ಕೊರತೆ ಮತ್ತು ಜನಪ್ರತಿನಿಧಿಗಳ ನಿರ್ಲಕ್ಷ್ಯದಿಂದಾಗಿ ಹಳ್ಳಕೊಳ್ಳಗಳ ರೈತರ ಕನಸುಗಳು ಕೇವಲ ಕಾಗದದ ಮೇಲೆಯೇ ಉಳಿಯುವಂತಾಗಿದೆ.
ಇದಕ್ಕೆ ಸ್ಪಷ್ಟ ನಿದರ್ಶನವೆಂಬಂತೆ, ಸೂರಗೊಂಡನಹಳ್ಳಿ ಕೆರೆಯಿಂದ ಆರಂಭವಾಗಿ ಆದಿರಾಳು ಹಾಗೂ ಹುಲಿತೊಟ್ಲು-1 ಮತ್ತು 2 ಕೆರೆಗಳ ಮೂಲಕ ತಾವಂದಿ ಚಿಕ್ಕಕೆರೆ ಮತ್ತು ದೊಡ್ಡ ಕೆರೆಗಳಿಗೆ ಭದ್ರಾ ನೀರನ್ನು ಹರಿಸುವ ಯೋಜನೆಯು ಇಂದು ತಾಂತ್ರಿಕ ಅಡೆತಡೆಗಳ ಸುಳಿಗೆ ಸಿಲುಕಿ ನತದೃಷ್ಟವಾಗಿದೆ.
ಚಿತ್ರದುರ್ಗದ ಬ್ರಾಂಚ್ ಕಾಲುವೆಗೆ ಕೆ.ಸಿ ರೊಪ್ಪ ಸಮೀಪದಲ್ಲಿ ಕೇವಲ 4 ಅಡಿ ಪೈಪ್ ಅಳವಡಿಸಲಾಗಿದೆ. ಇಲ್ಲಿಂದ ಭದ್ರಾ ನೀರು ಹೊರ ಬಂದು ಆದಿರಾಳು, ಹುಲಿತೊಟ್ಲು-1 ಮತ್ತು ಹುಲಿತೊಟ್ಲು-2 ಕೆರೆಗಳು ಸೇರಿದಂತೆ ಆ ಭಾಗದಲ್ಲಿರುವ ಗೋಕಟ್ಟೆ, ಕಟ್ಟೆ, ತಗ್ಗು ಗುಂಡಿ, ಹಳ್ಳಕೊಳ್ಳಗಳು ಭರ್ತಿಯಾಗಿ ಸುಮಾರು 14 ಕಿಲೋ ಮೀಟರ್ ದೂರದಲ್ಲಿರುವ ತಾವಂದಿ ಕೆರೆಗಳಿಗೆ ನೀರು ಹರಿದು ಬಂದು ತಾವಂದಿ ಕೆರೆ ಸೇರಬೇಕು.
ಪೈಪ್ ಅಳವಡಿಕೆ ಮಾಡಲಾಗಿರುವ ಕೆ.ಸಿ ರೊಪ್ಪ ಸಮೀಪದಿಂದ 14 ಕಿಲೋ ಮೀಟರ್ ದೂರದಲ್ಲಿ ತಾವಂದಿ ಚಿಕ್ಕಕೆರೆ ಮತ್ತು ದೊಡ್ಡ ಕೆರೆಗಳಿವೆ. ಈ 14 ಕಿಲೋಮೀಟರ್ ಅಂತರದಲ್ಲಿ ಎಲ್ಲ ರೀತಿಯ ಅಡೆ ತಡೆಗಳನ್ನು ನಿವಾರಿಸಿಕೊಂಡು ನೀರು ಹರಿದು ತಾವಂದಿ ಕೆರೆ ಸೇರಬೇಕಾಗಿದೆ.
ಯೋಜನೆಯ ಮಾರ್ಗ ಮತ್ತು ತಾಂತ್ರಿಕ ವಿಘ್ನಗಳು:
ಭದ್ರಾ ಜಲಾಶಯದಿಂದ ಹರಿದುಬರುವ ನೀರು ಕೆ.ಸಿ ರೊಪ್ಪ ಸಮೀಪದಲ್ಲಿ ಅಳವಡಿಸಿರುವ ಪೈಪ್ ಲೈನ್ ಮೂಲಕ ಸೂರಗೊಂಡನಹಳ್ಳಿ ಕೆರೆಯನ್ನು ತಲುಪಿ, ಅಲ್ಲಿಂದ ಮುಂದುವರಿದು ಆದಿರಾಳು ಮತ್ತು ಹುಲಿತೊಟ್ಲು ಕೆರೆಗಳ ಮೂಲಕ ತಾವಂದಿ ಭಾಗದ ಕೆರೆಗಳನ್ನು ತಲುಪಬೇಕು. ಇದು ಸರಪಳಿ ಮಾದರಿಯ ನೀರಾವರಿ ವ್ಯವಸ್ಥೆಯಾಗಿದ್ದು, ಒಂದು ಹಂತದಿಂದ ಮತ್ತೊಂದು ಹಂತಕ್ಕೆ ನೀರು ಸರಾಗವಾಗಿ ಹರಿಯಬೇಕಿದೆ. ಆದರೆ ಸ್ಥಳೀಯವಾಗಿ ಜಾರಿಯಲ್ಲಿರುವ ಕಾಮಗಾರಿಗಳ ಅಸ್ತವ್ಯಸ್ತತೆಯೇ ಇಡೀ ಯೋಜನೆಗೆ ಮುಳುವಾಗಿದೆ.
ಸೂರಗೊಂಡನಹಳ್ಳಿ ಕೆರೆಗೆ ಅತ್ಯಂತ ಸಣ್ಣ ಗಾತ್ರದ ಪೈಪ್‌ಲೈನ್ ಅಳವಡಿಸಿರುವುದರಿಂದ, ಅಲ್ಲಿಗೆ ಹರಿದುಬರುವ ನೀರಿನ ಪ್ರಮಾಣವೇ ತೀರಾ ಅಲ್ಪವಾಗಿದೆ. ಸದ್ಯಕ್ಕೆ ಬರುತ್ತಿರುವ ಆ ಮಿತ ಪ್ರಮಾಣದ ನೀರು ಮೊದಲು ಸೂರಗೊಂಡನಹಳ್ಳಿ ಕೆರೆ ಭರ್ತಿಯಾಗಬೇಕಿದೆ.
ಆ ಕೆರೆ ಸಂಪೂರ್ಣ ತುಂಬಿ ಕೋಡಿ ಬಿದ್ದ ಬಳಿಕವೇ ಮುಂದಿನ ಕೆರೆಗಳಿಗೆ ನೀರು ಹರಿಯಲು ಅವಕಾಶವಿರುತ್ತದೆ. ಆದರೆ ಸದ್ಯದ ಪರಿಸ್ಥಿತಿಯಲ್ಲಿ ಸೂರಗೊಂಡನಹಳ್ಳಿಯೇ ಭರ್ತಿಯಾಗುವುದು ದುಸ್ತರವಾಗಿರುವಾಗ, ಸರಪಳಿ ವ್ಯವಸ್ಥೆಯ ಕೊನೆಯಲ್ಲಿರುವ ತಾವಂದಿ ಚಿಕ್ಕಕೆರೆ ಮತ್ತು ತಾವಂದಿ ದೊಡ್ಡ ಕೆರೆಗಳಿಗೆ ನೀರು ತಲುಪುವುದು ಸೂರ್ಯ-ಚಂದ್ರರಿರುವಷ್ಟೇ ಸತ್ಯವಾದರೂ, ಪ್ರಾಯೋಗಿಕವಾಗಿ ಮಾತ್ರ 'ಕನಸಿನ ಮಾತು' ಎಂಬಂತಾಗಿದೆ.
ನಾಯಕನಿಲ್ಲದ ನೌಕೆ: ಶಾಸಕರ ಅಕಾಲಿಕ ಅಗಲಿಕೆ
ಯೋಜನೆಯಲ್ಲಿರುವ ಈ ಗಂಭೀರ ತಾಂತ್ರಿಕ ದೋಷಗಳನ್ನು ಸರಿಪಡಿಸಿ, ಅಧಿಕಾರಿಗಳ ಮೇಲೆ ಒತ್ತಡ ಹೇರಿ ಕಾಮಗಾರಿಯನ್ನು ಸುಧಾರಿಸಬೇಕಾದ ಜನಪ್ರತಿನಿಧಿಗಳೇ ಇಂದು ಕ್ಷೇತ್ರದಲ್ಲಿಲ್ಲದಿರುವುದು ಪರಿಸ್ಥಿತಿಯನ್ನು ಮತ್ತಷ್ಟು ದಯನೀಯವಾಗಿಸಿದೆ. ಜನರ ಸಮಸ್ಯೆಗಳನ್ನು ಆಲಿಸಿ, ಸರ್ಕಾರದ ಮಟ್ಟದಲ್ಲಿ ಹೋರಾಡಬೇಕಿದ್ದ ಸ್ಥಳೀಯ ಶಾಸಕ ಡಿ.ಸುಧಾಕರ್ ಅವರ ಅಕಾಲಿಕ ಸಾವು ಇಡೀ ಕ್ಷೇತ್ರಕ್ಕೆ ತುಂಬಲಾರದ ದೊಡ್ಡ ನಷ್ಟವಾಗಿ ಪರಿಣಮಿಸಿದೆ.
ಸಮಸ್ಯೆಗಳನ್ನು ಹೇಳಿಕೊಳ್ಳಲು ಅಕ್ಷರಶಃ ಕ್ಷೇತ್ರದಲ್ಲಿ ದಿಕ್ಕಿಲ್ಲದಂತಾಗಿದೆ. ರೈತರು ನೀರಿಗಾಗಿ ಪರದಾಡುತ್ತಿದ್ದರೆ, ಅಧಿಕಾರಿಗಳು ಮಾತ್ರ ಕೇವಲ ತಾತ್ಕಾಲಿಕ ಮಣ್ಣು ಮುಚ್ಚುವ ತಂತ್ರಗಳಿಗೆ ಮೊರೆಹೋಗುತ್ತಿದ್ದಾರೆಯೇ ಹೊರತು ಶಾಶ್ವತ ಪರಿಹಾರಕ್ಕೆ ಮುಂದಾಗುತ್ತಿಲ್ಲ. ಸಣ್ಣ ಪೈಪ್‌ಗಳ ಬದಲಿಗೆ ಬೃಹತ್ ಗಾತ್ರದ ಪೈಪ್‌ಲೈನ್ ಅಳವಡಿಸುವುದು ಹಾಗೂ ಹಾದಿಯಲ್ಲಿರುವ ತಡೆಗಳನ್ನು ತೆರವುಗೊಳಿಸದ ಹೊರತು ತಾವಂದಿ ಕೆರೆಗಳಿಗೆ ಭದ್ರಾ ನೀರು ಹರಿಯುವುದು ಕೇವಲ ಮರೀಚಿಕೆಯಾಗಿಯೇ ಉಳಿಯಲಿದೆ. ಇನ್ನೂ ತಾವಂದಿ ಕೆರೆಗಳಿಗೆ ನೀರು ಹರಿಯುವುದು ದುಸ್ತರವಾಗಿರುವಾಗ ಈ ಕೆರೆಗಳು ಭರ್ತಿಯಾದ ನಂತರ ಯರದಕಟ್ಟೆ ಕೆರೆ ಭರ್ತಿಯಾಗಿ ಕೋಡಿ ಹರಿದ ಮೇಲೆ ಹುಚ್ಚವ್ವನಹಳ್ಳಿ ಗ್ರಾಮದ ಸಮೀಪ ಇರುವ ಹಳ್ಳದ ಮೂಲಕ ವೇದಾವತಿ ನದಿ ಸೇರಬೇಕು. ಇದೂ ಕೂಡ ಕನಸಿನ ಮಾತೇ ಸರಿ ಎನ್ನುತ್ತಾರೆ ಸ್ಥಳೀಯ ಮುಖಂಡರು.
ಸಂಬಂಧಪಟ್ಟ ನೀರಾವರಿ ಇಲಾಖೆಯ ಅಧಿಕಾರಿಗಳು ಮತ್ತು ಸರ್ಕಾರ ಕೂಡಲೇ ಎಚ್ಚೆತ್ತುಕೊಂಡು, ತಾವಂದಿ ಕೆರೆಗಳತ್ತ ಭದ್ರಾ ನೀರು ಸರಾಗವಾಗಿ ಹರಿಯಲು ಅಗತ್ಯವಿರುವ ತಾಂತ್ರಿಕ ತಡೆಗಳನ್ನು ಯುದ್ಧೋಪಾದಿಯಲ್ಲಿ ನಿವಾರಿಸಬೇಕಿದೆ. ಇಲ್ಲದಿದ್ದರೆ, ಈ ಭಾಗದ ರೈತರ ಗೋಳು ಕೇಳುವವರೇ ಇಲ್ಲದಂತಾಗಿ, ಅಚ್ಚುಕಟ್ಟು ಪ್ರದೇಶದ ರೈತರು ಅಕ್ಷರಶಃ ಹನಿ ನೀರಿಗೂ ಪರದಾಡುವ ಶಾಪ ತಪ್ಪಿದ್ದಲ್ಲ.
ತಾವಂದಿ-ಸೂರಗೊಂಡನಹಳ್ಳಿ ತೋಟದ ಬೆಳೆಗಾರರ ಸಂಘ ಅಧ್ಯಕ್ಷ ತಾವಂದಿ ಗ್ರಾಮದ ಮುಖಂಡರಾದ ಮಾಲತೇಶ್, ನಾಗಣ್ಣ, ಕರಿಯಣ್ಣ, ರಮೇಶ್, ಚಿದಾನಂದಯ್ಯ, ಕೊಟ್ರಯ್ಯ, ಕಾಶಿನಾಥ್, ಸಿ.ಚಂದ್ರಶೇಖರ್, ದೇವಣ್ಣ, ಚಾವಣ್ಣ ಸೇರಿದಂತೆ ಮತ್ತಿತರ ಮುಖಂಡರು ಈ ಸಮಸ್ಯೆ ಬಗೆಹರಿಸದಿದ್ದರೆ ಉಗ್ರ ರೀತಿಯ ಹೋರಾಟಕ್ಕೆ ಮುನ್ನುಡಿ ಬರೆಯಬೇಕಾಗುತ್ತದೆ ಎಂದು ಅವರು ಎಚ್ಚರಿಸಿದ್ದಾರೆ.
