ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಸ್ಯಾಂಡಲ್‌ವುಡ್‌ನ 'ಆಕ್ಷನ್‌ಪ್ರಿನ್ಸ್‌' ಧ್ರುವ ಸರ್ಜಾ ಎಂದಿನ ಕಟ್ಟುಮಸ್ತಾದ ಮಾಸ್ ಹಾಗೂ ಆ್ಯಕ್ಷನ್ ಇಮೇಜ್‌ಗೆ ತಾತ್ಕಾಲಿಕ ಬ್ರೇಕ್‌ನೀಡಿ, ಸಂಪೂರ್ಣ ಭಿನ್ನವಾದ ಶೈಲಿಯ ಕಥಾಹಂದರದೊಂದಿಗೆ ಪ್ರೇಕ್ಷಕರ ಮುಂದೆ ಬರಲು ಸಜ್ಜಾಗಿದ್ದಾರೆ. ಅವರ ಮುಂದಿನ ಹೊಸ ಸಿನಿಮಾಗೆ ‘ಕೆಮಿಸ್ಟ್ರಿ’ ಎಂಬ ಆಕರ್ಷಕ ಟೈಟಲ್ ಇಡಲಾಗಿದ್ದು, ಸಿನಿರಸಿಕರಲ್ಲಿ ಭಾರೀ ಕುತೂಹಲ ಮೂಡಿಸಿದೆ.
ಸಿನಿಮಾಗೆ ಎಂಟ್ರಿ ಕೊಟ್ಟಿದ್ದೇ ಲವರ್‌ಬಾಯ್‌ಆಗಿ ಅಬ್ಬರಿಸಿದ್ದ ಧ್ರುವ ಸರ್ಜಾ ಅವರ ‘ಅದ್ದೂರಿ’ ಹಾಗೂ ‘ಬಹದ್ದೂರ್‌’ ಸಿನಿಮಾಗಳು ಇಂದಿಗೂ ಹಲವರ ಹಾರ್ಟ್‌ಫೇವರಿಟ್. ಆದರೆ, ತದನಂತರ ಬಂದ ಎಲ್ಲಾ ಸಿನಿಮಾಗಳಲ್ಲೂ ಅವರ ಲವರ್‌ಬಾಯ್‌ಇಮೇಜ್‌‌ಮರೆಯಾಗಿ, ಪಕ್ಕಾ ಆಕ್ಷನ್‌ಸಿನಿಮಾಗಳಲ್ಲೇ ಅವರು ತೆರೆ ಮೇಲೆ ಕಾಣಿಸಿಕೊಳ್ಳುತ್ತಿದ್ದರು. ಮತ್ತೆ ಯಾವಾಗ ಧ್ರುವ ಸರ್ಜಾ ಅವರನ್ನ ಹಳೆಯ ಲವರ್‌ಬಾಯ್ ರೂಪದಲ್ಲಿ ನೋಡೋದು ಎಂದು ಕಾಯುತ್ತಿದ್ದ ಅಭಿಮಾನಿಗಳಿಗೆ ಇದೀಗ ಚಿತ್ರತಂಡ ಭರ್ಜರಿ ಗುಡ್‌ನ್ಯೂಸ್‌ನೀಡಿದೆ.
ಕುಟುಂಬ ಸಮೇತ ನೋಡಬಹುದಾದ ಲವ್‌ಸ್ಟೋರಿ: ಇಲ್ಲಿಯವರೆಗೆ ಭರ್ಜರಿ ಆ್ಯಕ್ಷನ್, ಅಬ್ಬರದ ಡೈಲಾಗ್‌ಗಳು ಹಾಗೂ ಹೈ-ವೋಲ್ಟೇಜ್ ಸೀನ್‌ಗಳ ಮೂಲಕವೇ ಅಭಿಮಾನಿಗಳನ್ನ ರಂಜಿಸುತ್ತಿದ್ದ ಧ್ರುವ ಸರ್ಜಾ, ಈ ಬಾರಿ ಸಂಪೂರ್ಣ ಕುಟುಂಬ ಸಮೇತ ಕುಳಿತು ನೋಡಬಹುದಾದ ಲವ್‌ಸ್ಟೋರಿ ಮತ್ತು ಭಾವನಾತ್ಮಕ ಕಥಾಹಂದರವನ್ನ ಆಯ್ಕೆ ಮಾಡಿಕೊಂಡಿದ್ದಾರೆ. ಪ್ರೀತಿ, ಪ್ರೇಮ, ಕುಟುಂಬದ ಬಾಂಧವ್ಯ ಮತ್ತು ಮನಮಿಡಿಯುವ ಭಾವನೆಗಳು ಈ ಸಿನಿಮಾದ ಪ್ರಮುಖ ಜೀವಾಳವಾಗಿದ್ದು, ಇದು ಧ್ರುವ ಸರ್ಜಾ ಅವರ ನಟನೆಯಲ್ಲಿ ಹೊಸ ಆಯಾಮವನ್ನ ತೆರೆದಿಡಲಿದೆ.
ಪ್ರಮುಖ ತಾರಾಗಣ ಹಾಗೂ ತಂತ್ರಜ್ಞರು: ಈ ಚಿತ್ರದಲ್ಲಿ ಧ್ರುವ ಸರ್ಜಾಗೆ ನಾಯಕಿಯಾಗಿ ಪ್ರತಿಭಾವಂತ ನಟಿ ನಭಾ ನಟೇಶ್ ಸಾಥ್ ನೀಡ್ತಿರೋದು ಮತ್ತೊಂದು ವಿಶೇಷ. ಯುವ ನಿರ್ದೇಶಕ ವಿಶಾಲ್ ಆತ್ರೇಯ ಈ ಸಿನಿಮಾವನ್ನು ನಿರ್ದೇಶನ ಮಾಡುತ್ತಿದ್ದು, ದಕ್ಷಿಣ ಭಾರತದ ಪ್ರಸಿದ್ಧ ನಿರ್ಮಾಣ ಸಂಸ್ಥೆಯಾದ ‘ಪೀಪಲ್ ಮೀಡಿಯಾ ಫ್ಯಾಕ್ಟರಿ’ ಬ್ಯಾನರ್ ಅಡಿಯಲ್ಲಿ ಟಿ.ಜಿ ವಿಶ್ವಪ್ರಸಾದ್ ಹಾಗೂ ಕೃತಿ ಪ್ರಸಾದ್ ಭರ್ಜರಿಯಾಗಿ ನಿರ್ಮಿಸುತ್ತಿದ್ದಾರೆ.
ದಕ್ಷಿಣ ಭಾರತದಲ್ಲಿ ಈಗಾಗಲೇ ಹಲವು ಹಿಟ್ ಸಿನಿಮಾಗಳನ್ನ ನೀಡಿರುವ ‘ಪೀಪಲ್ ಮೀಡಿಯಾ ಫ್ಯಾಕ್ಟರಿ’ ಕನ್ನಡ ಚಿತ್ರರಂಗದಲ್ಲಿ ತನ್ನ ಅಡಿಪಾಯವನ್ನ ಬಲಪಡಿಸುತ್ತಿದೆ. ಈಗಾಗಲೇ ಕಿಚ್ಚ ಸುದೀಪ್, 'ಗೋಲ್ಡನ್ ಸ್ಟಾರ್' ಗಣೇಶ್ ಹಾಗೂ 'ರಿಯಲ್ ಸ್ಟಾರ್' ಉಪೇಂದ್ರ ಅವರಂತಹ ಸ್ಟಾರ್ ನಟರ ಜೊತೆ ಕೈಜೋಡಿಸಿರುವ ಈ ಸಂಸ್ಥೆ, ಈಗ ಧ್ರುವ ಸರ್ಜಾ ಅವರೊಂದಿಗೆ ಈ ದೊಡ್ಡ ಪ್ರಾಜೆಕ್ಟ್ ಕೈಗೆತ್ತಿಕೊಂಡಿದೆ.
ಮಾಸ್ ಹೀರೋ ಆಗಿ ಗುರುತಿಸಿಕೊಂಡಿರುವ ಧ್ರುವ ಸರ್ಜಾ ಹಾಗೂ ಹೊಸ ತಲೆಮಾರಿನ ಕ್ರಿಯೇಟಿವ್ ಆಲೋಚನೆ ಹೊಂದಿರುವ ನಿರ್ದೇಶಕ ವಿಶಾಲ್ ಆತ್ರೇಯ ಅವರ ಈ ಹೊಸ ಕಾಂಬಿನೇಷನ್ ಕನ್ನಡ ಚಿತ್ರರಂಗದಲ್ಲಿ ದೊಡ್ಡ ಮಟ್ಟದ ನಿರೀಕ್ಷೆ ಹುಟ್ಟುಹಾಕಿದೆ.
