ಚಂದ್ರವಳ್ಳಿ ನ್ಯೂಸ್, ಚಿತ್ರದುರ್ಗ:
ನಗರದ ಬುದ್ಧ ನಗರದಲ್ಲಿರುವ ಬುದ್ಧ ಸರ್ಕಲ್‌ನಲ್ಲಿ ಆಯೋಜಿಸಲಾಗಿದ್ದ ಡಾ. ಬಿ.ಆರ್. ಅಂಬೇಡ್ಕರ್ ಅವರ 70ನೇ ಧಮ್ಮ ದೀಕ್ಷಾ ದಿನಾಚರಣೆಯನ್ನು ದೀಪ ಬೆಳಗಿಸುವ ಮೂಲಕ ಅರ್ಥಪೂರ್ಣವಾಗಿ ಆಚರಿಸಲಾಯಿತು.
ಕಾರ್ಯಕ್ರಮದಲ್ಲಿ ಬುದ್ಧ ವಿಹಾರದ ಮುಖ್ಯಸ್ಥ ಬಿ.ಪಿ. ತಿಪ್ಪೇಸ್ವಾಮಿ ಮಾತನಾಡಿ, "ಶೋಷಣೆ ಹಾಗೂ ಅಸಮಾನತೆಯ ವಿರುದ್ಧ ಹೋರಾಡಿದ ಅಂಬೇಡ್ಕರ್ ಅವರು ಮಾನವೀಯ ಮೌಲ್ಯಗಳ ಸಮಾನ ಸಮಾಜಕ್ಕಾಗಿ ಬೌದ್ಧ ಧರ್ಮ ಸ್ವೀಕರಿಸಿದರು. ಕೇವಲ ಸೌಲಭ್ಯಗಳಿಗಿಂತ ಸ್ವಾಭಿಮಾನದ ಬದುಕು ಮುಖ್ಯ ಎಂದು ಪ್ರತಿಪಾದಿಸಿದ ಅವರ ಧಮ್ಮಚಕ್ರ ಪ್ರವರ್ತನ ರಥವನ್ನು ಮುನ್ನಡೆಸಿ, ಪ್ರಬುದ್ಧ ಭಾರತ ನಿರ್ಮಿಸುವುದು ಪ್ರತಿಯೊಬ್ಬರ ಕರ್ತವ್ಯ" ಎಂದರು. ಅಲ್ಲದೆ, ತಮ್ಮ ಸಂಪಾದನೆಯ ಶೇ. 20 ರಷ್ಟನ್ನು ಸಮಾಜ ಸೇವೆಗೆ ನೀಡಬೇಕೆಂಬ ಬಾಬಾಸಾಹೇಬರ ತತ್ತ್ವವನ್ನು ಸ್ಮರಿಸಿ, ಸಮಾಜಮುಖಿ ಸೇವೆಗೆ ಕರೆ ನೀಡಿದರು.
ಮುಖ್ಯ ಭಾಷಣ ಮಾಡಿದ ಅಂಬೇಡ್ಕರ್ ವಿಚಾರವಾದಿ ದ್ಯಾಮಣ್ಣ ಮೈತ್ರಿ, "ದೇಶದ ನೈತಿಕ ಹಾಗೂ ಬೌದ್ಧಿಕ ಶಕ್ತಿ ಬುದ್ಧನ ತತ್ತ್ವಗಳಲ್ಲಿದೆ. ಬಹುಜನರು ರಾಜ್ಯಾಧಿಕಾರ ಪಡೆಯುವ ಜೊತೆಗೆ ಸಾಂಸ್ಕೃತಿಕ ಜಾಗೃತಿಯನ್ನು ಮನೆ ಮನೆಗೆ ತಲುಪಿಸಬೇಕು" ಎಂದರು. ಹಾಗೆಯೇ, ಚಿತ್ರದುರ್ಗದಲ್ಲಿ ಹೆಚ್ಚುತ್ತಿರುವ ಕೋಮುದ್ವೇಷ ಹಾಗೂ ಸಮುದಾಯದೊಳಗಿನ ಭಿನ್ನಾಭಿಪ್ರಾಯಗಳ ವಿರುದ್ಧ ಪ್ರಜ್ಞಾವಂತರು ಒಂದಾಗಬೇಕೆಂದು ಕಳವಳ ವ್ಯಕ್ತಪಡಿಸಿದರು.
ಕಾರ್ಯಕ್ರಮದಲ್ಲಿ ಸೀಗೆಹಟ್ಟಿ ಶಿವಶಂಕರ್ ಅವರು ಬುದ್ಧ ವಂದನೆ ಮತ್ತು ಪಂಚಶೀಲ ಪಠಿಸಿದರೆ, ಸಿದ್ದೇಶ್ ಅವರು 22 ಪ್ರತಿಜ್ಞಾವಿಧಿ ಬೋಧಿಸಿದರು. ಈ ಸಂದರ್ಭದಲ್ಲಿ ಬಿ.ಎಸ್.ಐ ಪದಾಧಿಕಾರಿಗಳು, ಪ್ರಮುಖ ಚಿಂತಕರು, ಗಣ್ಯರು ಹಾಗೂ ಸಾರ್ವಜನಿಕರು ಉಪಸ್ಥಿತರಿದ್ದರು.
