ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ಸಿಲಿಕಾನ್ ಸಿಟಿ ಬೆಂಗಳೂರು ಕೇವಲ ಭಾರತದ ಯುನಿಕಾರ್ನ್ ರಾಜಧಾನಿ ಮಾತ್ರವಲ್ಲ, 1 ಬಿಲಿಯನ್ ಡಾಲರ್ ಮೌಲ್ಯದತ್ತ ದಾಪುಗಾಲು ಹಾಕುತ್ತಿರುವ 'ಸುನಿಕಾರ್ನ್' ಸಂಸ್ಥೆಗಳ ಅತ್ಯಂತ ಪ್ರಬಲ ನೆಲೆ ಹಾಗೂ ರಾಜಧಾನಿಯಾಗಿ ಹೊರಹೊಮ್ಮಿದೆ ಎಂದು ಮಾಹಿತಿ ತಂತ್ರಜ್ಞಾನ ಮತ್ತು ಜೈವಿಕ ತಂತ್ರಜ್ಞಾನ ಸಚಿವ ಪ್ರಿಯಾಂಕ್ ಖರ್ಗೆ ತಿಳಿಸಿದ್ದಾರೆ.
ಭಾರತದಲ್ಲಿರುವ ಒಟ್ಟು 133 ಯುನಿಕಾರ್ನ್ಗಳಲ್ಲಿ ಸುಮಾರು 55 ಯುನಿಕಾರ್ನ್ ಸಂಸ್ಥೆಗಳಿಗೆ ಬೆಂಗಳೂರು ಕೇಂದ್ರಸ್ಥಾನವಾಗಿದ್ದು, ಇವುಗಳ ಒಟ್ಟು ಮೌಲ್ಯ ಅಂದಾಜು 196 ಬಿಲಿಯನ್ ಡಾಲರ್ಗಳಷ್ಟಿದೆ. ಈ ಮೂಲಕ ಜಾಗತಿಕವಾಗಿ ಬೇ ಏರಿಯಾ, ನ್ಯೂಯಾರ್ಕ್, ಬೀಜಿಂಗ್ ಹಾಗೂ ಲಂಡನ್ಗೆ ನಂತರದ ಸ್ಥಾನದಲ್ಲಿ ನಿಲ್ಲುವ ಮೂಲಕ ಬೆಂಗಳೂರು ವಿಶ್ವದ 5ನೇ ಅತಿ ದೊಡ್ಡ ಯುನಿಕಾರ್ನ್ ಹಬ್ ಎನಿಸಿಕೊಂಡಿದೆ.
ಮುಂದಿನ ಪೀಳಿಗೆಯ ನವೋದ್ಯಮಗಳಲ್ಲೂ ಬೆಂಗಳೂರು ಮುಂಚೂಣಿ:ಸುನಿಕಾರ್ನ್ಗಳ ಭದ್ರಕೋಟೆ: ದೇಶದಲ್ಲಿರುವ ಒಟ್ಟು 156 ಸುನಿಕಾರ್ನ್ಗಳಲ್ಲಿ ಮೂರನೇ ಒಂದಕ್ಕಿಂತ ಹೆಚ್ಚು ಅಂದರೆ 56 ಸುನಿಕಾರ್ನ್ಗಳನ್ನು ಹೊಂದಿರುವ ಬೆಂಗಳೂರು, ದೆಹಲಿ (38) ಹಾಗೂ ಮುಂಬೈ (34) ನಗರಗಳನ್ನು ಹಿಂದಿಕ್ಕಿ ಅಗ್ರಸ್ಥಾನದಲ್ಲಿದೆ.
ವಿವಿಧ ಕ್ಷೇತ್ರಗಳಲ್ಲಿ ನಾವೀನ್ಯತೆ: ಈ ನವೋದ್ಯಮಗಳು ಫಿನ್ಟೆಕ್, ಎಂಟರ್ಪ್ರೈಸ್ ಟೆಕ್, ಇ-ಕಾಮರ್ಸ್, ಕೃತಕ ಬುದ್ಧಿಮತ್ತೆ, ಹೆಲ್ತ್ಟೆಕ್, ಕ್ಲೀನ್ಟೆಕ್, ಅಗ್ರಿಟೆಕ್ ಹಾಗೂ ಸುಧಾರಿತ ಹಾರ್ಡ್ವೇರ್ ಕ್ಷೇತ್ರಗಳಲ್ಲಿ ಕಾರ್ಯನಿರ್ವಹಿಸುತ್ತಿವೆ.
ರಾಜ್ಯ ಸರ್ಕಾರದ ಸೂಕ್ತ ನೀತಿಗಳು, ಪ್ರಬುದ್ಧ ಮಾನವ ಸಂಪನ್ಮೂಲ ಹಾಗೂ ಅತ್ಯುತ್ತಮ ನಾವೀನ್ಯತಾ ಪರಿಸರ ವ್ಯವಸ್ಥೆಯಿಂದಾಗಿ, ಅಮೆರಿಕ, ಯುರೋಪ್ ಹಾಗೂ ಚೀನಾವನ್ನು ಹೊರತುಪಡಿಸಿ ವಿಶ್ವದ ಅತಿ ದೊಡ್ಡ ಸ್ಟಾರ್ಟ್ಅಪ್ ಕೇಂದ್ರವಾಗಿ ಬೆಂಗಳೂರು ಬೆಳೆಯಲಿದೆ. ಭಾರತದ ಮುಂದಿನ ಪೀಳಿಗೆಯ ಪ್ರಮುಖ ಉದ್ಯಮ ಸಂಸ್ಥೆಗಳು ನಿರ್ಮಾಣವಾಗುವ ಪ್ರಮುಖ ತಾಣವಾಗಿ ಬೆಂಗಳೂರು ಮುಂದುವರಿಯಲಿದೆ ಎಂದು ಪ್ರಿಯಾಂಕ್ ಖರ್ಗೆ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
