ಚಂದ್ರವಳ್ಳಿ ನ್ಯೂಸ್, ಬೆಂಗಳೂರು:
ದೇಶದಲ್ಲಿ ನಡೆಯುತ್ತಿರುವ ಮತಕಳ್ಳತನ ಹಾಗೂ ಕ್ಷೇತ್ರ ಮರುವಿಂಗಡಣೆಯ ಹುನ್ನಾರವನ್ನು ತಡೆಯಲು ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್‌ಕುಮಾರ್‌ಅವರ ರಾಜೀನಾಮೆ ಅನಿವಾರ್ಯ ಎಂದು ಕಾಕ್ರೋಚ್‌ಜನತಾ ಪಾರ್ಟಿ (ಸಿಜೆಪಿ) ಸಂಸ್ಥಾಪಕ ಅಭಿಜಿತ್‌ದೀಪ್ಕೆ ಘೋಷಿಸಿದ್ದಾರೆ.
ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ (ಎಸ್ಐಆರ್) ರದ್ದುಪಡಿಸುವಂತೆ ಆಗ್ರಹಿಸಿ ಬೆಂಗಳೂರಿನ ಫ್ರೀಡಂ ಪಾರ್ಕ್‌ನಲ್ಲಿ ಸಿಜೆಪಿ ಹಾಗೂ ವಿವಿಧ ಸಂಘಟನೆಗಳ ನೇತೃತ್ವದಲ್ಲಿ 'ಜನತಾ ನ್ಯಾಯಾಲಯ' ಸಮಾವೇಶ ನಡೆಯಿತು. ಈ ವೇಳೆ ಮಾತನಾಡಿದ ಅಭಿಜಿತ್‌ದೀಪ್ಕೆ, ನೀಟ್‌ಹಗರಣದಲ್ಲಿ ಧರ್ಮೇಂದ್ರ ಪ್ರಧಾನ್‌ಅವರ ವಿಕೆಟ್‌ಬಿದ್ದಂತೆ, ಮುಂದಿನ ವಿಕೆಟ್‌ಜ್ಞಾನೇಶ್‌ಕುಮಾರ್‌ಅವರದ್ದು ಎಂದರು. ಜ್ಞಾನೇಶ್‌ಕುಮಾರ್‌ರಾಜೀನಾಮೆ ನೀಡುವವರೆಗೆ ನಮ್ಮ ಹೋರಾಟ ಮುಂದುವರಿಯಲಿದ್ದು, ಕ್ಷೇತ್ರ ವಿಂಗಡಣೆ ಮೂಲಕ ಸಂಸತ್ತಿನಲ್ಲಿ ದಕ್ಷಿಣ ಭಾರತದ ಪ್ರಾತಿನಿಧ್ಯ ಕಡಿಮೆ ಮಾಡಲು ಬಿಡುವುದಿಲ್ಲ ಎಂದು ಎಚ್ಚರಿಸಿದರು.
ಮೋದಿ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದ ಅವರು, ಗಾಂಧಿ ದೇಶದ ಆತ್ಮವಾದರೆ, ಅಂಬೇಡ್ಕರ್‌ಬೆನ್ನೆಲುಬು ಮತ್ತು ನೆಹರು ಯೋಚನಾ ಶಕ್ತಿ ಎಂದರು. ಪ್ರಧಾನಿ ಮೋದಿ ಮತಕಳ್ಳತನದ ಮೂಲಕವೇ ಅಧಿಕಾರಕ್ಕೆ ಬಂದಿದ್ದಾರೆ ಎಂದು ಆರೋಪಿಸಿದರು.
ಪ್ರಕರಣ ದಾಖಲಿಸಲು ಒತ್ತಾಯಿಸಿದ ನಟ ಪ್ರಕಾಶ್‌ರಾಜ್‌ ಸಮಾವೇಶದಲ್ಲಿ ಭಾಗವಹಿಸಿ ಮಾತನಾಡಿದ ನಟ ಪ್ರಕಾಶ್‌ರಾಜ್‌, ಆದಿವಾಸಿಗಳು, ಬಡವರು ಮತ್ತು ಮುಸ್ಲಿಮರ ಮತದಾನದ ಹಕ್ಕನ್ನು ವ್ಯವಸ್ಥಿತವಾಗಿ ಕಸಿದುಕೊಳ್ಳಲಾಗುತ್ತಿದೆ ಎಂದರು. ಜ್ಞಾನೇಶ್‌ಕುಮಾರ್‌ವಿರುದ್ಧ ಪ್ರಕರಣ ದಾಖಲಿಸಿ ವಿಚಾರಣೆ ನಡೆಸಬೇಕು ಹಾಗೂ ಎಸ್‌ಐಆರ್‌ರದ್ದುಪಡಿಸಿ ಜನರ ಹಕ್ಕನ್ನು ಮರಳಿಸುವವರೆಗೆ ಹೋರಾಟ ನಿಲ್ಲುವುದಿಲ್ಲ ಎಂದು ಸ್ಪಷ್ಟಪಡಿಸಿದರು.
ಶೂನ್ಯ ಹೊಣೆಗಾರಿಕೆ, ಪಾರದರ್ಶಕತೆ: ಧ್ರುವ್‌ರಾಠಿ ಕಿಡಿ
ಯುಟ್ಯೂಬರ್‌ಧ್ರುವ್‌ರಾಠಿ ಮಾತನಾಡಿ, ಎಸ್‌ಐಆರ್‌ನಲ್ಲಿ ಚುನಾವಣಾ ಆಯೋಗವು ಶೂನ್ಯ ಹೊಣೆಗಾರಿಕೆ ಮತ್ತು ಪಾರದರ್ಶಕತೆ ತೋರಿದೆ ಎಂದು ಟೀಕಿಸಿದರು. ಪಶ್ಚಿಮ ಬಂಗಾಳ, ಬಿಹಾರ ಮತ್ತು ಗೋವಾದಲ್ಲಿ ಸಾವಿರಾರು/ಲಕ್ಷಾಂತರ ಅರ್ಹ ಮತದಾರರ ಹೆಸರುಗಳನ್ನು ಪಟ್ಟಿಯಿಂದ ವಜಾಗೊಳಿಸಲಾಗಿದೆ ಎಂದು ಅಂಕಿಅಂಶಗಳ ಸಮೇತ ಆಕ್ರೋಶ ವ್ಯಕ್ತಪಡಿಸಿದರು. ಪ್ರತಿಯೊಬ್ಬ ನಾಗರಿಕನ ಮತದಾನದ ಹಕ್ಕನ್ನು ರಕ್ಷಿಸುವುದು ಪಕ್ಷಾತೀತ ಕರ್ತವ್ಯ ಎಂದು ಹೇಳಿದರು.
ಸಿಲಿಕಾನ್‌ಸಿಟಿಯಲ್ಲಿ ಮಾರ್ದನಿಸಿದ ಘೋಷಣೆಗಳು
ದಿಲ್ಲಿ, ಮುಂಬಯಿ ಬಳಿಕ ಬೆಂಗಳೂರಿನಲ್ಲೂ ಎಸ್‌ಐಆರ್‌ವಿರುದ್ಧದ ಪ್ರತಿಭಟನೆಯ ಕಿಚ್ಚು ಹತ್ತಿಕೊಂಡಿತು. ಸಭೆಯಲ್ಲಿ ಅಭಿಜಿತ್‌ದೀಪ್ಕೆ 'ಗ್ಯಾನು ಇಟ್ಸ್‌ಡನ್‌ಬ್ರೊ' ಹಾಗೂ ಧ್ರುವ್‌ರಾಠಿ 'ವೋಟ್‌ಚೋರ್‌, ಗದ್ದಿ ಚೋಡ್‌' ಘೋಷಣೆಗಳನ್ನು ಕೂಗಿದರು. 'ಜ್ಞಾನೇಶ್‌ಇಸ್ತಿಫಾ ದೋ' ಹಾಗೂ 'ಇನ್‌ಕ್ವಿಲಾಬ್‌ಜಿಂದಾಬಾದ್‌' ಘೋಷಣೆಗಳು ಮೊಳಗಿದವು.
ಪ್ರತಿಭಟನೆಯಲ್ಲಿ ಸುಮಾರು 4ರಿಂದ 5 ಸಾವಿರಕ್ಕೂ ಅಧಿಕ ಜನರು ಪಾಲ್ಗೊಂಡಿದ್ದರು. ಸಮಾವೇಶದಲ್ಲಿ ಸಿಜೆಪಿ ವಕ್ತಾರ ಸೌರವ್‌ದಾಸ್‌, ಹಿರಿಯ ಸಾಹಿತಿ ದೇವನೂರು ಮಹಾದೇವ, ಆರ್ಥಿಕ ತಜ್ಞ ಪರಕಾಲ ಪ್ರಭಾಕರ್‌, ಐಶೆ ಘೋಷ್‌, ಅಶುತೋಷ್‌ರಂಕಾ ಸೇರಿದಂತೆ ವಿವಿಧ ಪ್ರಗತಿಪರ ಸಂಘಟನೆಗಳ ಮುಖಂಡರು ಉಪಸ್ಥಿತರಿದ್ದರು.
