ಚಂದ್ರವಳ್ಳಿ ನ್ಯೂಸ್, ಮಂಗಳೂರು:
ಪ್ರಧಾನಮಂತ್ರಿ ನರೇಂದ್ರ ಮೋದಿ, ಗೃಹ ಸಚಿವ ಅಮಿತ್ ಶಾ ಹಾಗೂ ಮುಖ್ಯ ಚುನಾವಣಾ ಆಯುಕ್ತ ಜ್ಞಾನೇಶ್ ಕುಮಾರ್ ಅವರಿಗೆ ಬಹಿರಂಗ ಸವಾಲು ಎಸೆದಿರುವ ಬಹುಭಾಷಾ ನಟ ಪ್ರಕಾಶ್ ರಾಜ್, "ಧೈರ್ಯವಿದ್ದರೆ ಮಾಧ್ಯಮಗಳ ಎದುರು ನನ್ನೊಂದಿಗೆ ನೇರ ಸಂವಾದಕ್ಕೆ ಕುಳಿತುಕೊಳ್ಳಲಿ, ಮತಗಳ್ಳತನದ ಬಗ್ಗೆ ದಾಖಲೆ ಸಹಿತ ಸಾಬೀತು ಮಾಡುತ್ತೇನೆ" ಎಂದು ಮಂಗಳೂರಿನಲ್ಲಿ ನಡೆದ ಮಾಧ್ಯಮಗೋಷ್ಠಿಯಲ್ಲಿ ಆಕ್ರೋಶ ಹೊರಹಾಕಿದ್ದಾರೆ.
ಸವಾಲು ಮತ್ತು ಜೈಲು ಶಿಕ್ಷೆ: "ಮಾಧ್ಯಮಗಳ ಸಮ್ಮುಖದಲ್ಲಿ ಎಡಿಟ್ ಮಾಡದ ನೇರ ಪ್ರಸಾರದಲ್ಲಿ ಸಂವಾದ ನಡೆಯಲಿ. ನಾನು ನೀಡುವ ಮತಗಳ್ಳತನದ ದಾಖಲೆಗಳು ಸುಳ್ಳಾದರೆ ನಾನು ಜೈಲಿಗೆ ಹೋಗುತ್ತೇನೆ, ಇಲ್ಲದಿದ್ದರೆ ಅವರು ಜೈಲಿಗೆ ಹೋಗಲು ಸಿದ್ಧರಿದ್ದಾರೆಯೇ?" ಎಂದು ಪ್ರಶ್ನಿಸಿದರು.
ಎಸ್‌ಐಆರ್ ಮತ್ತು ನುಸುಳುಕೋರರ ಹೆಸರಿನಲ್ಲಿ ಕೋಟಿ ಹಣ ಪೋಲು: ಕರ್ನಾಟಕದಲ್ಲಿ ಲಕ್ಷಾಂತರ ನುಸುಳುಕೋರರಿದ್ದಾರೆ ಎಂದು ಬಿಂಬಿಸಿ ಇಡೀ ರಾಜ್ಯದ 5.5 ಕೋಟಿ ಜನರ ಮತಪಟ್ಟಿ ಪರಿಷ್ಕರಣೆ ನಡೆಸಲಾಯಿತು. ಆದರೆ ಸಿಕ್ಕಿದ್ದು ಕೇವಲ ಇಬ್ಬರು ಮಹಿಳೆಯರು (ಒಬ್ಬರು ಪಾಕಿಸ್ತಾನ ಹಾಗೂ ಒಬ್ಬರು ಬಾಂಗ್ಲಾದೇಶ ಮೂಲದವರು). ಇದಕ್ಕಾಗಿ ಜನಸಾಮಾನ್ಯರ ಕೋಟ್ಯಂತರ ರೂ. ತೆರಿಗೆ ಹಣ ಪೋಲು ಮಾಡಲಾಗಿದೆ ಎಂದು ಆಪಾದಿಸಿದರು.
ಬಡವರು ಹಾಗೂ ಆದಿವಾಸಿಗಳ ಮತಗಳ್ಳತನ: 'ಆಬ್ಸೆಂಟ್/ಶಿಫ್ಟೆಡ್' ನೆಪದಲ್ಲಿ ತೆಗೆದುಹಾಕಲಾಗಿರುವ 70 ರಿಂದ 80 ಲಕ್ಷ ಮತದಾರರಲ್ಲಿ ಹೆಚ್ಚಿನವರು ದಲಿತರು, ಹಿಂದುಳಿದವರು, ಅಲ್ಪಸಂಖ್ಯಾತರು ಮತ್ತು ಬಡ ಆದಿವಾಸಿಗಳು. ಪ್ರಶ್ನಿಸುವ ಶಕ್ತಿ ಇಲ್ಲದ ಇವರ ಸಂವಿಧಾನಬದ್ಧ ಮತದಾನದ ಹಕ್ಕನ್ನೇ ಕಸಿಯಲಾಗಿದೆ.
ಮುಖ್ಯ ಚುನಾವಣಾ ಆಯುಕ್ತರಿಗೆ ವಿನಾಯಿತಿ ಏಕೆ?: ಜ್ಞಾನೇಶ್ ಕುಮಾರ್ ಅವರು ತಪ್ಪುಗಳ ಮೇಲೆ ತಪ್ಪು ಮಾಡುತ್ತಿದ್ದಾರೆ. ಅವರ ವಿರುದ್ಧ ಯಾವುದೇ ಕೋರ್ಟ್‌ನಲ್ಲಿ ಕೇಸ್ ದಾಖಲಾಗದಂತೆ ಡಿಸೆಂಬರ್ 2023ರಲ್ಲಿ ವಿಪಕ್ಷ ಸಂಸದರನ್ನು ಅಮಾನತುಗೊಳಿಸಿ 'ನ್ಯಾಯಾಂಗ ವಿನಾಯಿತಿ' ತರಲಾಗಿದೆ. ದೇಶದ ರಾಷ್ಟ್ರಪತಿ ಅಥವಾ ಪ್ರಧಾನಿಗೇ ಇಲ್ಲದ ರಕ್ಷಣೆ ಇವರಿಗೆ ಏಕಿದೆ ಎಂದು ಆಕ್ಷೇಪಿಸಿದರು.
ಮಹಾರಾಷ್ಟ್ರ ಮತ್ತು ಬೆಂಗಳೂರಿನಲ್ಲಿ ಅಕ್ರಮ: ಮಹಾರಾಷ್ಟ್ರದಲ್ಲಿ ಸಂಸತ್ ಚುನಾವಣೆ ಮುಗಿದ ಕೇವಲ 5.5 ತಿಂಗಳಲ್ಲಿ 42 ಲಕ್ಷ ಹೊಸ ಮತದಾರರನ್ನು ಸೇರಿಸಿ, ಬಳಿಕ 2 ಕೋಟಿ ಮತಗಳನ್ನು ತೆಗೆದುಹಾಕಿ ಅಕ್ರಮ ಎಸಗಲಾಗಿದೆ. ಬೆಂಗಳೂರಿನಲ್ಲೂ ಶೇ.50ರಷ್ಟು ಮತದಾರರನ್ನು ಆಬ್ಸೆಂಟ್/ಶಿಫ್ಟೆಡ್ ಎಂದು ಪಟ್ಟಿಯಿಂದ ತೆಗೆದುಹಾಕಲಾಗಿದೆ.
ಮೃತರ ಲೆಕ್ಕಾಚಾರದಲ್ಲಿ ವಂಚನೆ: ಕರ್ನಾಟಕದಲ್ಲಿ ವರ್ಷಕ್ಕೆ ಸರಾಸರಿ 4 ಲಕ್ಷ ಜನ ಮೃತಪಟ್ಟರೆ, ಚುನಾವಣಾ ಆಯೋಗ 20 ರಿಂದ 25 ಲಕ್ಷ ಜನ ಸತ್ತಿದ್ದಾರೆ ಎಂದು ತೋರಿಸಿ ಬದುಕಿರುವವರ ಮತ ಹಕ್ಕನ್ನು ಕಸಿದುಕೊಂಡಿದೆ.
ಸಿ.ಟಿ.ರವಿಗೆ ಚಾಲೆಂಜ್ & ಕೋರ್ಟ್ ಹೋರಾಟ: "ನನ್ನ ವೋಟರ್ ಐಡಿ ತೆಗೆಯಲು ನೋಡಿ ಫಾರ್ಮ್ 6 ಭರ್ತಿ ಮಾಡಲು ಹೇಳಿದರು, ನಾನು ಅದಕ್ಕೆ ಒಪ್ಪಿಲ್ಲ. ಈ ಅಕ್ರಮಗಳ ವಿರುದ್ಧ ಸುಪ್ರೀಂ ಕೋರ್ಟ್‌ವರೆಗೆ ಹೋರಾಡುತ್ತೇನೆ. ಬಿಜೆಪಿ ಮುಖಂಡ ಸಿ.ಟಿ.ರವಿ ಅವರಿಗೆ ಧೈರ್ಯವಿದ್ದರೆ ನನ್ನೊಂದಿಗೆ 23 ಜಿಲ್ಲೆಗಳಿಗೆ ಬರಲಿ, ನೂರಾರು ಯುವಕರು ಸಂಗ್ರಹಿಸಿರುವ ಸಾಕ್ಷ್ಯಗಳನ್ನು ಅವರ ಮುಂದಿಡುತ್ತೇನೆ" ಎಂದು ಚಾಲೆಂಜ್ ಮಾಡಿದರು.
ಇದು ರಾಜಕೀಯ ಪಕ್ಷದ ಹೋರಾಟವಲ್ಲ, ಭಾರತದ ಪ್ರಜೆಗಳ ಸ್ವಾಭಿಮಾನದ ಆಂದೋಲನ. ಮುಂದಿನ ದಿನಗಳಲ್ಲಿ ದೆಹಲಿಯಲ್ಲಿ ನಡೆಯಲಿರುವ ರಾಷ್ಟ್ರೀಯ ಹೋರಾಟದಲ್ಲೂ ಭಾಗವಹಿಸುವುದಾಗಿ ಮತ್ತು ಕರಾವಳಿ ಭಾಗದಲ್ಲಿ ಮನೆಮನೆಗೆ ತೆರಳಿ ಜನ ಜಾಗೃತಿ ಮೂಡಿಸುವುದಾಗಿ ಪ್ರಕಾಶ್ ರಾಜ್ ತಿಳಿಸಿದ್ದಾರೆ.
