ಚಂದ್ರವಳ್ಳಿ ನ್ಯೂಸ್, ಹಿರಿಯೂರು:
ತಾಲೂಕು ಕಚೇರಿ ಸಭಾಂಗಣದಲ್ಲಿ ಮತದಾರರ ಪಟ್ಟಿಗಳ ವಿಶೇಷ ಸಮಗ್ರ ಪರಿಷ್ಕರಣೆ (SIR 2026) ಸಂಬಂಧ ಸಹಾಯಕ ಮತದಾರರ ನೋಂದಣಾಧಿಕಾರಿ ಹಾಗೂ ತಹಶೀಲ್ದಾರ್ ಎಂ. ಸಿದ್ದೇಶ್ ಅವರ ಅಧ್ಯಕ್ಷತೆಯಲ್ಲಿ ವಿವಿಧ ರಾಜಕೀಯ ಪಕ್ಷಗಳ ಮುಖಂಡರ ಸಭೆ ನಡೆಯಿತು.
ಸಭೆಯನ್ನುದ್ದೇಶಿಸಿ ಮಾತನಾಡಿದ ತಹಶೀಲ್ದಾರ್ ಎಂ. ಸಿದ್ದೇಶ್, "ಭಾರತ ಚುನಾವಣೆ ಆಯೋಗದ ವೇಳಾಪಟ್ಟಿಯಂತೆ ಚಿತ್ರದುರ್ಗ ಜಿಲ್ಲೆಯ 100-ಹಿರಿಯೂರು ವಿಧಾನಸಭಾ ಕ್ಷೇತ್ರದಲ್ಲಿ ಮತದಾರರ ಪಟ್ಟಿಯ ವಿಶೇಷ ಸಮಗ್ರ ಪರಿಷ್ಕರಣೆ ಕೈಗೊಳ್ಳಲಾಗುತ್ತಿದೆ. ರಾಜಕೀಯ ಪಕ್ಷಗಳಿಗೆ ಮತದಾರರ ಗಣತಿ ನಮೂನೆಗಳನ್ನು ವಿತರಿಸಲಾಗಿದ್ದು, ಪರಿಷ್ಕರಣೆ ಕಾರ್ಯ ಯಶಸ್ವಿಗೊಳಿಸಲು ಪಕ್ಷಗಳ ಸಹಕಾರ ಅಗತ್ಯ" ಎಂದು ಕೋರಿದರು.
ಕ್ಷೇತ್ರದ ಮತದಾರರ ವಿವರ ಹಾಗೂ ಗಣತಿ ಪ್ರಗತಿ:
ಮತದಾರರ ಸಂಖ್ಯೆ (16-06-2026 ಕ್ಕೆ ಇದ್ದಂತೆ): ಹಿರಿಯೂರು ಕ್ಷೇತ್ರದಲ್ಲಿ ಒಟ್ಟು 287 ಮತಗಟ್ಟೆಗಳಿದ್ದು (ಭಾಗಗಳು), 1,23,537 ಪುರುಷರು, 1,27,928 ಮಹಿಳೆಯರು ಹಾಗೂ 17 ತೃತೀಯಲಿಂಗಿಗಳು ಸೇರಿದಂತೆ ಒಟ್ಟು 2,51,482 ಮತದಾರರಿದ್ದಾರೆ.
ಗಣತಿ ನಮೂನೆ ವಿತರಣೆ (07-08-2026 ರವರೆಗೆ): ಒಟ್ಟು 2,51,482 ಗಣತಿ ನಮೂನೆಗಳನ್ನು ವಿತರಿಸುವ ಮೂಲಕ ಶೇ. 100 ರಷ್ಟು ಪ್ರಗತಿ ಸಾಧಿಸಲಾಗಿದೆ.
ಗಣಕೀಕರಣ ಪ್ರಗತಿ: ವಿತರಿಸಲಾದ ನಮೂನೆಗಳಲ್ಲಿ 2,21,968 (ಶೇ. 88.26) ನಮೂನೆಗಳ ಗಣಕೀಕರಣ ಪೂರ್ಣಗೊಂಡಿದೆ.
ದಾಖಲಾದ ಮಾಹಿತಿ: ಗಣತಿ ವೇಳೆ 6,738 ಮರಣ ಪ್ರಕರಣಗಳು, 15,039 ಶಾಶ್ವತ ವಲಸೆ ಪ್ರಕರಣಗಳು, 4,058 ದ್ವಿಪ್ರತಿ (ಡಬಲ್ ಎಂಟ್ರಿ) ಹೆಸರುಗಳು, 3,621 ಗೈರುಹಾಜರಿ ಹಾಗೂ 58 ಇತರೆ ಪ್ರಕರಣಗಳನ್ನು ಗುರುತಿಸಲಾಗಿದೆ.
(ಹಿಂದಿನ 2002ರ ಕೊನೆಯ SIR ಪರಿಷ್ಕರಣೆ ವೇಳೆ ಕ್ಷೇತ್ರದಲ್ಲಿ 225 ಭಾಗಗಳಿದ್ದು, 1,03,084 ಪುರುಷರು ಹಾಗೂ 1,01,711 ಮಹಿಳೆಯರು ಸೇರಿದಂತೆ ಒಟ್ಟು 2,04,795 ಮತದಾರರಿದ್ದರು).
BLA-2 ನೇಮಕ ಹಾಗೂ ಸೂಚನೆ:
ಕ್ಷೇತ್ರದ ಎಲ್ಲಾ ಬಿ.ಎಲ್.ಒ (BLO) ಗಳು ಪ್ರತಿಯೊಂದು ಮನೆಗೆ ತೆರಳಿ ಗಣತಿ ನಮೂನೆ ವಿತರಿಸಲು ಕ್ರಮ ಕೈಗೊಂಡಿದ್ದಾರೆ. ಎಲ್ಲಾ ರಾಜಕೀಯ ಪಕ್ಷಗಳು ತಮ್ಮ ವ್ಯಾಪ್ತಿಯ ಮತಗಟ್ಟೆ ಮಟ್ಟದ ಏಜೆಂಟರನ್ನು (BLA-2) ನೇಮಿಸಿ, ಬಿ.ಎಲ್.ಒ ಗಳೊಂದಿಗೆ ಸಂಪರ್ಕದಲ್ಲಿದ್ದು ಗಣತಿ ನಮೂನೆಗಳ ಭರ್ತಿ ಹಾಗೂ ವಿತರಣೆ ಕುರಿತು ಸಾರ್ವಜನಿಕರಿಗೆ ಸೂಕ್ತ ಮಾಹಿತಿ ನೀಡಬೇಕೆಂದು ತಹಶೀಲ್ದಾರರು ಸೂಚಿಸಿದರು.
ಸಭೆಯಲ್ಲಿ ಜೆಡಿಎಸ್ ತಾಲೂಕು ಅಧ್ಯಕ್ಷ ಹನುಮಂತರಾಯಪ್ಪ, ನಗರ ಬ್ಲಾಕ್ ಕಾಂಗ್ರೆಸ್ ಉಪಾಧ್ಯಕ್ಷ ಜ್ಞಾನೇಶ್, ಬಿಜೆಪಿ ಮುಖಂಡ ನಿತಿನ್ ಗೌಡ ಹಾಗೂ ತಾಲೂಕು ಕಚೇರಿಯ ಸಿಬ್ಬಂದಿ ಉಪಸ್ಥಿತರಿದ್ದರು.
