ಚಂದ್ರವಳ್ಳಿ ನ್ಯೂಸ್, ಕಲಬುರಗಿ:
ಜಾತಿ ತಾರತಮ್ಯ ಮತ್ತು ಅಸ್ಪೃಶ್ಯತೆಯಂತಹ ಆಚರಣೆಗಳಿಂದಾಗಿ ಹಿಂದೂ ಧರ್ಮ ಅಳಿವಿನ ಹಾದಿಯಲ್ಲಿದೆ ಎಂದು ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ತೀವ್ರ ಕಳವಳ ವ್ಯಕ್ತಪಡಿಸಿದ್ದಾರೆ.
ವಿಜಯದಶಮಿಯ ಅಂಗವಾಗಿ ನಗರದ ಬುದ್ಧ ವಿಹಾರದಲ್ಲಿ ಸಿದ್ಧಾರ್ಥ ವಿಹಾರ ಟ್ರಸ್ಟ್ ಆಯೋಜಿಸಿದ್ದ 70ನೇ ಧಮ್ಮ ಚಕ್ರ ಪ್ರವರ್ತನ ದಿನಾಚರಣೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.
ಸಭೆಯನ್ನುದ್ದೇಶಿಸಿ ಮಾತನಾಡಿದ ಖರ್ಗೆ, "ಹಿಂದೂ ಧರ್ಮದಲ್ಲಿದ್ದ ಅನ್ಯಾಯ ಹಾಗೂ ಅಸ್ಪೃಶ್ಯತೆಯನ್ನು ಸದಾ ವಿರೋಧಿಸುತ್ತಿದ್ದ ಡಾ. ಬಿ.ಆರ್. ಅಂಬೇಡ್ಕರ್ ಅವರು, 'ನಾನು ಹಿಂದೂವಾಗಿ ಹುಟ್ಟಿದ್ದೇನೆ, ಆದರೆ ಹಿಂದೂವಾಗಿ ಸಾಯುವುದಿಲ್ಲ' ಎಂದು 1935ರಲ್ಲೇ ಘೋಷಿಸಿದ್ದರು," ಎಂದು ಸ್ಮರಿಸಿಕೊಂಡರು.
ಇಂದಿಗೂ ಜಾತೀಯತೆ ಜೀವಂತ: ದೇಶದಲ್ಲಿ ಇಂದಿಗೂ ಜಾತೀಯತೆ ಸಂಪೂರ್ಣವಾಗಿ ನಿರ್ಮೂಲನೆಯಾಗಿಲ್ಲ ಎಂದ ಖರ್ಗೆ, ತಮ್ಮ ಸ್ವಂತ ಅನುಭವವೊಂದನ್ನು ಹಂಚಿಕೊಂಡರು. "ಉತ್ತರಾಖಂಡದಲ್ಲಿ ನಾನು ಭಾಷಣ ಮಾಡಿ ಬಂದ ಎರಡು ದಿನಗಳ ಬಳಿಕ, ನಾನು ನಿಂತಿದ್ದ ಸ್ಥಳವನ್ನು ತೊಳೆದು ಸ್ವಚ್ಛಗೊಳಿಸಲಾಯಿತು. ಭಾಷಣ ಮುಗಿದ ತಕ್ಷಣ ತೊಳೆದಿದ್ದರೆ ಕೊಳೆ ಸ್ವಚ್ಛಗೊಳಿಸಿದರು ಎಂದು ಭಾವಿಸಬಹುದಿತ್ತು. ಆದರೆ ಎರಡು ದಿನಗಳ ನಂತರ ಸ್ಥಳ ತೊಳೆಯುವ ಈ ಮಾನಸಿಕತೆ ಎಂತಹ ಮೂಢನಂಬಿಕೆ? ಇದು ಮಾನಸಿಕ ಹಿಂಸೆಯಲ್ಲವೇ?" ಎಂದು ಅವರು ಪ್ರಶ್ನಿಸಿದರು.
ಸಮಾನತೆಯ ಹಕ್ಕಿಗಾಗಿ ಪ್ರಶ್ನೆ: "ನೀವು ಮಾರ್ಟಿನ್ ಅವರನ್ನು ಆಹ್ವಾನಿಸುತ್ತೀರಿ, ಮೊಹಮ್ಮದ್ ಅವರನ್ನು ಪ್ರೀತಿಯಿಂದ ಕರೆಯುತ್ತೀರಿ, ಆದರೆ ಮಲ್ಲಿಕಾರ್ಜುನನನ್ನು ಮಾತ್ರ ಏಕೆ ಆಹ್ವಾನಿಸುವುದಿಲ್ಲ? ನನ್ನ ಜನರನ್ನು ಸಮಾಜದಿಂದ ಹೊರಗಿಡುವುದೇಕೆ? ನಮಗೆ ಕುಡಿಯಲು ನೀರು ಮತ್ತು ಸೂಕ್ತ ಶಿಕ್ಷಣವನ್ನು ಏಕೆ ತಡೆಯುತ್ತೀರಿ, ನಾವೇನು ಮನುಷ್ಯರಲ್ಲವೇ? ಧರ್ಮದೊಳಗೆ ಇಂತಹ ವಿಭಜನೆಗಳು ಹಾಗೂ ಭಿನ್ನಾಭಿಪ್ರಾಯಗಳು ಸೃಷ್ಟಿಯಾಗಲು ಈ ತಾರತಮ್ಯವೇ ಮುಖ್ಯ ಕಾರಣವಲ್ಲವೇ?" ಎಂದು ಅವರು ಆಕ್ರೋಶ ವ್ಯಕ್ತಪಡಿಸಿದರು.
